Umutoza Mashami Vincent watozaga ikipe ya Police FC wanigeze gutoza Ikipe y’Igihugu Amavubi, yatangajwe nk’Umutoza Mukuru wa Dodoma Jiji FC yo muri Tanzania.
Mashami Vincent yatangajwe ku mugaragaro n’ubuyobozi bw’iyi kipe yo mu Mujyi wa Dodoma kuri uyu wa Gatatu tariki 06 Kanama 2025 nyuma yo gusinya amasezerano yo kuba umutoza mukuru w’iyi kipe.
Iyi kipe ya Dodoma Jiji FC igiye gutozwa n’umutoza w’Umunyarwanda, umwaka ushize w’imikino wa 2024-2025, yawusoje iri ku mwanya wa 12 ku rutonde rwa Shampiyona.
Mashami yerecyeje gutoza muri Tanzania nyuma y’imyaka itatu atoza ikipe ya Police FC mu Rwanda, yahesheje ibikombe bibiri, icy’Amahoro ndetse n’icya Super Coupe.
Mbere yo gutoza Police FC, Mashami yatoje andi makipe anyuranye, arimo Ikipe y’Igihugu y’u Rwanda, Amavubi yagejeje muri 1/4 mu Gikombe cya Afurika cy’abakina imbere mu Bihugu CHAN 2020 cyabaye muri 2021 muri Cameroon.
Mashami ubu ugiye gutoza muri Tanzania, kandi yanyuze mu yandi makipe mu Rwanda, nka APR FC, Bugesera FC ndetse na Isonga FC.
RADIOTV10
