Perezida wa Repubulika y’u Rwanda, Paul Kagame yitabiriye ibiganiro byahuje abagize Inama y’Ubutegetsi y’Urwego Rushinzwe Iterambere mu Rwanda (RDB), yize ku mishinga y’ingenzi y’uru Rwego ndetse n’ingamba zigamije kwihutisha iterambere rishingiye ku rwego rw’abikorera.
Muri iyi nama yabereye ku Cyicaro Gikuru cya RDB, hasuzumwe imishinga yihutirwa ya RDB ndetse n’ingamba zigamije kwihutisha iterambere ry’ubukungu rishingiye ku ishoramari n’urwego rw’abikorera.
Ibiro by’Umukuru w’Igihugu cy’u Rwanda, byatangaje ko “Muri iki gitondo, ku Biro by’Urwego Rushinzwe Iterambere mu Rwanda (RDB), Perezida Kagame yifatanyije n’Abagize Inama y’Ubutegetsi ya RDB.”
Perezidansi ya Repubulika y’u Rwanda, yakomeje ivuga ko “Iyi nama yasuzumiye hamwe ibikorwa by’ingenzi bya RDB ndetse n’ingamba ziriho zigamije kwihutisha iterambere ry’Ubukungu bushingiye ku rwego rw’abikorera, kureshya ndetse no korohereza ishoramari, guteza imbere urwego rw’ibyoherezwa hanze n’ubukerarugendo ndetse no kongerera imbaraga ihangana ry’ibikorerwa mu Rwanda ku isoko mpuzamahanga.”
Muri iyi nama, Perezida Kagame yashimangiye akamaro ko gukomeza gushyira imbere ishyirwa mu bikorwa ry’ibikorwa no gutanga serivisi zinoze, ndetse no kubazwa inshingano, no guhora hongerwa ireme ry’imikorere.
Yagaragaje kandi ko hakwiye gukomeza gushyirwaho uburyo bwiza kandi bworohereza abikorera n’abashoramari gukora no guteza imbere ibikorwa byabo mu Rwanda.
Iyi nama ibaye mu gihe RDB ifite mu nshingano gukomeza guteza imbere urwego rw’abikorera, gukurura ishoramari ryo mu gihugu n’iryo hanze, guteza imbere ubukerarugendo n’ibyoherezwa mu mahanga, ndetse no kugira uruhare mu kongera ubushobozi bw’u Rwanda bwo guhangana ku rwego mpuzamahanga.
Ni inama kandi ibaye habura iminsi ibarirwa ku ntoki ngo mu Rwanda habe igikorwa cy’ingenzi mu bukerarugendo, cyo Kwita Izina abana b’Ingagi kigiye kuba ku nshuro yacyo ya 21, cyitabirwa n’abaturutse mu mpfuruka zose z’Isi.
RADIOTV10