Umuhanzi Uworizagwira Florien uzwi nka Yampano, yasabye imbabazi abafana be n’Abanyarwanda bose muri rusange ku bw’amashusho ye y’ibanga yagiye hanze, avuga ko ari ihohoterwa rikomeye yakorewe kandi ko inzego zibishinzwe ziri kubikoraho iperereza.
Ni mu butumwa uyu muhanzi yatanze nyuma yuko hasakaye amashusho y’urukozasoni agaragaramo uyu muhanzi ari mu gikorwa cy’imibonano mpuzabitsina n’umukunzi we, bikazamura impaka ndende.
Mu itangazo yashyize hanze avuga ko rigenewe abafana be, itangazamakuru n’Umuryango w’Abanyarwanda wose, Yampano yatangiye yibutsa ko izina rye ryamenyekanye kubera gushyigikirwa n’abantu ku bw’impano afite mu muziki.
Akomeza agira ati “Mbere na mbere, ndashaka gusaba imbabazi bivuye ku mutima ku bw’agahinda n’umubabaro byatewe n’ibyabaye vuba aha byo gushyira ahagaragara videwo yihariye ku buryo budakurikije amategeko.”
Arongera ati “Ibi byabaye ihohoterwa rikomeye kandi ribabaza cyane, kandi ndicuza nanasaba imbabazi uwo ari we wese iyi video yaba yagezeho, abafana banjye, itangazamakuru ndetse n’umuryango wacu w’Abanyarwanda dusangiye ufite indangagaciro zo kwiyubaha.”
Muri iri tangazo, Yampano avuga ko inzego zibishinzwe ziri gukora iperereza kuri iki kibazo, kandi ko yizeye ko azahabwa ubutabera, ku buryo ababikoze bazabihanirwa.
Ati “Ndimo ndafatanya na bo byimazeyo kandi nizeye inzira yo gutanga ubutabera.”
Yaboneyeho gusaba abantu kurekera gukwirakwiza ariya mashusho. Ati “Hagati aho, ndasaba buri wese, cyane cyane abashobora kuba bagisangira cyangwa bakwirakwiza videwo, kubihagarika ako kanya. Ibikorwa nk’ibi ntabwo byemewe ahubwo ni ibinyuranyije n’amategeko, kuko bikomeza kwangiza ubuzima bwite, n’isura yanjye nk’umuhanzi.”
Yampano kandi yanaboneyeho kwizeza abafana be ko ibyabaye bitamuca intege mu mwuga we w’ubuhanzi, ahubwo ko azakomeza gushyira hanze ibihangano.
Ati “niyemeje gukomeza guhanga umuziki mwiza uduhuza. Ndasezeranya ko nzabivamo nkomeye cyane, mpanga indirimbo zubaka n’umuryango Nyarwanda.”
Uyu muhanzi kandi aherutse gutangaza ko yamaze gutanga ikirego kiregwamo uwitwa Patrick Ishimwe uzwi nka Pazzo, banigeze kubana amufasha gucunga imbuga nkoranyambaga ze, anashinja kuba ari we uri inyuma y’isakara ry’ariya mashusho.
Yampano atangaza ko uyu wahoze ari inshuti ye, ari we wari ufite ariya mashusho yafashe mu buryo bw’ibanga abyumvikanyeho n’umukunzi we, ndetse ko yigeze kubimukangisha ko azayashyira hanze, nyuma yuko bagiranye ibibazo byazamuwe no kuba yaramusabye kwimuka kugira ngo abashe kwisanzurana n’umukunzi we bari batangiye kubana.
RADIOTV10
