Nyuma yuko umuhanzi Bruce Melodie arangije ibitaramo bye muri Canada, undi muhanzi nyarwanda yahise yerecyeza muri iki Gihugu na we mu bitaramo ahafite, ndetse mu ntangiro z’umwaka utaha, undi muhanzi ukomeye mu Rwanda akazerecyezayo.
Mu mpera z’icyumweru gishize, Bruce Melodie yataramiye mu Mujyi wa Vancouver muri Canada mu gitaramo gisoza ibitaramo bine yakoreraga muri iki Gihugu.
Ni mu gihe Kenny Sol na we yamaze kugera muri iki Gihugu mu bitaramo bibiri ahafite, mu gihe The Ben na we ari mu myiteguro yo kuzajya gutaramirayo umwaka utaha.
Kenny Sol wamaze kugera muri Canada, azataramira mu Mujyi wa Ottawa ku wa 15 Ugushyingo 2024 ndetse n’i Montreal tariki 22 Ugushyingo 2024.
Uyu muhanzi waherukaga muri Canada muri Nzeri umwaka ushize wa 2023, yavuze ko agiye ku butumire bw’abakunzi be bakomeje kumwereka ko bakimunyotewe.
Ati “Barabizi ko nta kintu mba narabahishe, tuzatarama nk’ibisanzwe, tuzishima twongere duhure n’Abanyarwanda cyangwa se n’abanyamahanga muri rusange.”
Biteganyijwe ko The Ben azatarama mu Mujyi wa Montreal ku wa 14 Gashyantare 2025, akazakomereza muri Ottawa, asoreze mu Mujyi witwa Edmonton tariki 01 Werurwe 2025.
Ibitaramo bya The Ben ntibiratangazwaho byinshi, gusa biri gutegurwa na Sosiyete ya Euphoria Records isanzwe ifasha abahanzi Nyarwanda gutaramira muri iki Gihugu cya Canada.
Felix NSENGA
RADIOTV10
